فرحة عمري

أم عمير :

الكلام اللى فوق ده مش انا اللى كاتباه للأسف بس هو نفسه اللى عاوزة اقوله النهاردة
فى نهاية الموضوع الاصلى .. الكاتبة هتنهيه نهاية حزينة اوى
وهى ان كل المشاعر الجميلة دى ..
كانت وهم كل الاحاسيس الصادقة دى ..
كانت حلم صحيت منهم على صوت منبه
بس النهاردة انا كتبت الموضوع ده وهنهيه نهاية سعيدة
لأن ربنا اكرمنى ولبست النقاب النهاردة
النهاردة بس كنت أسعد بنت على وجه الارض
النهارده بس اول مرة احس يعنى ايه المرأة فى الاسلام ملكة متوجه

.. جوهرة مصونة

مفيش غير غواص واحد بس هو اللى هيشوفها
ويفوز بيها النهاردة بس حققت حلم فضلت شهور طويلة احلم بيه
حققته وانا مش مصدقة لحد اللحظة دى إنه حصل
فين ايام ما قررت انى البسه ومن لحظة القرار بس وفتوحات ربنا نازلة عليا
فين ايام ما كنت بدخل المسجد واشوف البنات رافعين نقابهم وبيصلوا
وادعى ربنا انى اكون زيهم فى يوم واوصى كل واحدة فيهم تدعيلى بالنقاب
فين يوم ما شفت صحبة بنات منتقبات ادام الجامعة كان منظرهم مهيب فعلا..
حسيت يومها بوجع فى قلبى..
لأن نفسى اكون زيهم ومش قادرة
فين ايام ما كنت بدعى فى كل صلاة ..
إن ربنا يرزقنى النقاب قبل ما اموت
وانه ميقبضش روحى الا وانا محجبة حجاب كامل..
حجاب يرضيه فين ايام ما كنت كل شوية اشترى نقاب جديد ..
واستنى بالليل لما الكل ينام علشا اقيسه وافضل بيه اطول وقت ممكن ..
وكانت متعتى بجد كل ما احس انى مخنوقة من الدنيا
اروح اعملها
فين يوم ما نزلت حلقة الشيخ هانى حلمى"ماذا بعد النقاب"
ولم أجرؤ إنى أشغلها..
علشان قلبى ميوجعنيش أكتر النهاردة اول ما رجعت وفتحت الجهاز..
دورت عليها وقلبى بيدق خلاص هسمعها بعد كل المدة دى ؟!!
فين يوم ما بكيت اوى لما سمعت حلقة الشيخ ايمن صيدح فى رمضان عن الحجاب
وحكى قصة بنت مكملتش18 سنة ..
كانت صالحة تقية بارة بأهلها..بتساعد زمايلاها المحتاجين..
وليها فى كل عمل خير نصيب…
وربنا رزقها النقاب ويوم زفافها على الزوج الصالح…
لقوها ميتة ساجدة لحبيبها الأعلى يومها بكيت وبكيت ..
كان اكتر يوم فى حياتى اتمنيت النقاب فيه كان نفسى اموت زيها وربنا يكرمنى بالخاتمة الحسنة دى النهاردة كل ده افتكرته ..